تأملات فى التركيبة المصرية الجديدة

تأملات فى التركيبة المصرية الجديدة
الكلام النهاردة عن المصرى او لنكون ادق عن التركيبه الجديدة للمصرى
ايوة الجيل اللى عاش فى مصر فى اخر 30 سنة وما زال حيا بيننا
الانسان المصرى من السهل جدا تلاقيه فى اماكن زى محطات المترو ومحطات التوبيس العام _روح عبد المنعم رياض او رمسيس_يمتاز المصرى بحدوث عدة تغيرات فسيولوجية له وذلك لتتلائم وظائف المصرى البشرية مع البيئة المصرية التى يحيى فيها المصرى
وعلى سبيل المثال وليس الحصر
أ-فمعده المصرى حدث لها تطور فاصبحت تفرز سائل هو اشبه بماء النار المركز وذلك لتستطيع ان تتلائم وتقوم بوظيفتها فى هضم المسامير التى اصبحت تتواجد بصفة مستمرة فى ارغفة العيش
ناهيك طبعا عن القمح المسرطن والغير صالح للاستخدام الادمى
وغيره وغيره مما ياكله المصرى
ب-ساقى المصرى حدث لهما ايضا تطور فاصبحت سرعيتهما تقارب سرعة النعامة او الفهد وذلك ليتمكن المصرى من العدو خلف الميكروباظ _وصيلة مواصلات مصرية تصنع بواسطة تويوتا اليابانية_والذى يمارس دوما هوايته المفضله فى ان يجرى ويخلى الناس تجرى وراه
ج-الجزء المسئول عن العد والاحصاء فى مخ المصرى حدث له تطور حيث تفوقت قدراته على الاحصاء والعد وذلك ليتمكن المصرى من عد واحصاء الفلوس اللى عليه والحاجات اللى نقصاه وذلك خلال جلسات النميمة والنق على مخاليق ربنا
د-العصب السمعى الذى يصل بين الاذن وبين الجزء المسئول عن السمع فى المخ اصابه من الحب جانب وحدث له تطور حيث زادت قدرته على تلقى الاصوات وبث الاشارات للمخ وذلك ليتمكن المصرى من تلقى اكبر قدر من الاوامر من الناس اللى فوق وينفذها
وقد صرح السيد مسئول انه قد تقرر ابتكار خانة جديدة فى بطاقة الرقم القومى غير النوع والديانة وهى خانة سرعة تلقى وتنفيذ الاوامر
وستقام مسابقة كل عام فى تحديد الاسرع على ان يكون الحد الادنى من السرعة هو 50امر \ ثانية
ه-لسان المصرى تطور حتى اصبحت سرعته فى نقل الاشاعات اقصاها
وقد صرح السيد مسئول _غير اللى فوق- بان سرعة لسان المصرى فى نقل الاشاعات قد جاوزت سرعة الصوت وقاربت سرعة الضوء
المصرى اجدع واحد يطلع نكت وتعتبر النكتة عند المصرى هى احسن اداه للتنفيس عن الظلم والقهر الذى يعانى منه
ودايما بيقول المصرى فى نكته كل ما لا يقوله علانيه وقدام الناس
مرة الرئيس مبرك...................
انه المصرى حيث الاسلوب الذى يتبعه مع من بتعامل معهم ويعتبره اسلوب امثل فى التعامل هو اسلوب لوى الدراع
يلوى دراع الاقل منه والاعلى منه يلوى دراعه وهكذا حتى اصبحت الحياه بالنسبة للمصرى دائرة مفرغة من لوى الادرع
المصرى احسن حد ينطبق عليه مقوله ابو حيان التوحيدى
اغرب الغرباء من كان غريبا فى وطنه
المصرى بفضل ربنا سبحانه وتعالى اولا
ثم بفضل سائقى الاتوبيسات والميكروباصات فى مصر امهر من لاعبى اكروبات السيرك
يركب الاتوبيس من دول وهو ماشى وينزل منه بمهارة ولا اجدع لعيب سيرك
المصرى عنده شويه سلبية لو اتوزعت على الدنيا كلها هتخربها
تلاقى الكلمة المفضله ليه كانها الكلمة السحرية
هى وانا مالى
وتلاقيه يقولك اياكش الدنيا تولع بس انا اكون بخير
واياكش حرف تمنى وللدعاء
او تلاقى اللى تعليمهم برانى -بلغه اهل بره- يقولو
اياكش الدنيا تفير بس انا اكون فين
المصرى عنده اعتقاد راسخ بان افضل مكان لتلبية نداء الطبيعة وعمل بىبى هو الشارع والامر نفسه بالنسبة لرمى الزباله حيث اعتقاد المصرى بان الشارع ما هو الا نقلب زباله كبير
المصرى ما زال معتقد ان اللى شغال فى الخليج او فى اوربا بيغرف فلوس من غير حساب
المصرى ذكى بس بيتغابى
المصرى بيكذب الكذبة ويعيش الدور ويصدقها
المصرى متناقض جدا
تلاقسه شويه يقولك الدنيا لسة بخير
وشويه يقولك ولاد الحرام ماخلوش لولاد الحلال حاجة
ينصح اخنه بالحجاب واخوه بالصلاه ويسب الدين للى يكسر عليه بالعربية
المصرى حيث فوت علينا بكرة

المصرى حيث شيلنى اشيلك عرقنى اخدمك
المصرى حيث الذكاء فى التزويغ من الشغل وضرب الاجازات المرضية
المصرى حيث انا اعمل بجد اذن انا حمار
المصرى حيث عمل وتكوين الصداقات بسرعة فى اشارات المرور وفى طوابير العيش وطوابير المصالح الحكومية


وبعد هذا سيكون الرد المنطقى لسؤال نانسى عجرم
لو سالتك انت مصرى تقولى ايه
الله يسامحك اهو انتى اللى مصرية