*مبدئيا كده انت شايف ان فيه حرية عقيدة فى مصر؟
-لا مش شايف كده
*طيب ايه مظاهر عدم وجود حرية للعقيدة ؟
-بص الحرية مش معناها انى اقدر امارس معتقدى وخلاص
لا ده معناها ان ما فيش حد يضايقنى علشان انا بمارس المعتقد ده
وده بيظهر عكسه فى نظرة المجتمع لغير المسلمين على انهم درجة تانية واقل من المسلمين اللى هم اصحاب البلد فى الدنيا وفى الاخرة ففى الدنيا لازم يتهانوا ويا خدوا بالجزمة وفى الاخرة هيتحرقوا فى النار
*(اقاطعه) بس الدستور بيكفل حرية العقيدة
-وايه فايدة مواد الدستور اللى بتكفل حرية العقيدة وبتنص على عدم التمييزوانا عندى المادة التانية من الدستور بتقولى الدين الاسلامى هو المصدر الرئيسى للتشريع والاسلام هو دين الدولة طيب والباقى يروح بقى فى 60 داهية
كمان عايز اقولك حاجة القوانين والدساتير مواد جامده ملهاش اى لازمة من غير تطبيق
القائمين على القانون فى مصر بشر عاديين من المجتمع ده مش ملايكة يعنى
يعنى هيبقوا متاثرين بافكار وثقافة المجتمع متربيين على ان غير المسلمين كفرة ودرجة تانية من وهم اطفال فى البيت فى المدرسة فى الشارع .
*طيب بمناسبة المدارس ايه رايك فى تدريس الدين فى المدارس ومناهج العربى واقصد ايات القران خاصة وان فيه كتير بينادوا بالغاء تدريس التربية الدينية فى المدارس واستبدالها بمادة الاخلاق؟
-بص انت دخلتنا فى موضوع كبير قوى وهو دور المدرسة فى زيادة المشكلة
الطالب بيقضى فى المدرسة تقريبا ربع اليوم يعنى المدرسة هى تانى مكان ممكن ياخد منه افكاره وثقافته
تفتكر ينفع يبقى فيه فصل فيه 50 طالب منهم واحد بس مسيحى بيخرج فى حصة الدين الاسلامى منظره هو ايه وزملائه لازم يسالوا هو ليه فلان بيخرج ليه فى الحصة دى بالذات اكيد هيحسوا انه اقل منهم ومش منهم
ومن ناحية تانية انت مافيش عندك مدرسين للتربية الدينية المسيحية فى المدارس فالادارة يا اما تخلى المسيحى يلعب لحد ما الحصة دى تخلص
و بتخلى اى مدرس مسيحى فى المدرسة يقعد يتكلم معاه شوية فى الدين
اقولك على حاجة
انا لما كنت فى المدرسة كان اللى بيدينى دين مسيحى مدرس علوم فى المدرسة .
تصور مدرس علوم بيدينى دين مسيحى طيب هل هو كفء ؟ هل هو معتدل دينيا ولا متشدد او متطرف ؟
انت عارف ده ممكن يكبر المشكلة يفضل المدرس يكلم الطفل عن اضطهاد المسيحيين وعن هيمنة المسلمين وعن كره المسلمين للمسيحيين
ويكلمه عن ناس هو لا يعرف عنهم شئ فيطلع فرد مسيحى بيكره المسلمين ومتطرف وشوية شوية يقفوا قصاد المسلمين والبلد تولع
*تفتكر مصر ممكن يحصل فيها حرب اهلية طائفية؟
-ما استبعدش ده يحصل
*يا اخى فال الله ولا فالك بتتكلم بجد؟
-اه بكلمك بجد صدقنى ايه اللى يمنع اذا كانت الدنيا قربت تتقسم نصين مسيحين ومسلمين
يا عم ده انت تدخل اى مصلحة حكومية المسلم يروح للمسلم والمسيحى يروح للمسيحى
اضحكك
ده المسيحى اللى قاعد فى الاتوبيس او المترو يستنى لما يشوف واحدة مش محجبة او معلقة الصليب فى رقبتها علشان يقوم لها
والمسلم ما يقومش لاى واحدة مش محجبة او معلقة الصليب
ده انت عندك اقباط عاملين ع النت جمهورية الاقباط ومخليين البابا شنودة رئيسها
*(اقاطعه ضاحكا)
وانت بقى من جمهورية الاقباط ؟
-لا انا من جمهورية مصر
*طيب تفتكر قدامنا قد ايه على ما تقوم حرب طائفيه لا قدر الله ؟
-بص ما اقدرش اقول لك ده هيحصل بكره وبرضه ما اقدرش اقول لك ده مش ممكن يحصل فى الحالتين ابقى بضحك على نفسى قبل ما اضحك على اى حد
لكن احنا دلوقتى من وجهة نظرى فى مرحلة الاحتقان الطائفى
*طيب كويس قوى انك فتحت الموضوع ده موضوع الاحتقان الطائفى مش شايف ان فيه حوادث عادية بتحصل بين اى اتنين بتتحول لمشكلة طائفية زى مثلا مشكلة كاميليا زوجة الكاهن المسيحى ؟
-اه
*الدنيا قامت واتقال انها اتخطفت والمسلمين خطفوها علشان تسلم والحكاية طلعت غير كده خالص
-كلامك صح الحكاية طلعت انها كانت متخانقة مع زوجها وراحت عند واحدة صاحبتها فى القاهرة
*طيب ليه الحبه بقت قبه؟
-بص يا احمد لو جبت طفل وضربك بايده على وشك الضربة هتوجعك؟
*لا طبعا
-طيب لو وشك ده وارم ومتعور فيه ومتبهدل
هل ضربة الولد هتوجعك ساعتها؟
*اه
-هو ده اللى حاصل عندنا فى مصر دلوقتى مصر كلها وارمة ومش مستحملة اى حاجة فاى حاجة بتعمل قلق جامد
ده لو مسيحى كسر على مسلم بالعربية فالمسلم سب الدين للمسيحى
*على فكرة ممكن المسلم يسب للمسلم الدين لو كسر عليه بالعربية
-اه ما انا بقولك دى حاجة عادية جدا بتحصل كل يوم مليون مرة بس ازاى بقى مسلم يسب الدين لمسيحى الدنيا هتقوم وهيقولولك المسيحيين مضطهدين ليه بقى؟؟؟
*علشان مصر وارمة
(نضحك سويا)
*طيب انت شايف ايه سبب كل ده خاصة ان مصر طول عمرها فيها تعددية دينية ؟
-بص الكلام فى النقطة دى يطول هيطول ليشمل ايه اللى اتغير فى المجتمع المصرى من قرب نهاية حكم عبد الناصر لحد دلوقتى والاسباب واللى اتغير كتير اوى
عندك مثلا انتشار الفقر ومش اى فقر ده فقر مدقع انت عندك 44% تقريبا من الشعب المصرى تحت خط الفقر
يعنى مش لاقيين ياكلوا عايز اللى مش لاقى ياكل ده يحترم دين الاخر واختلافه ولا عايزة يقعد معاه ويحلل الاختلاف
استحالة
كمان عندك الجهل بالاخر المسلمين لا يعرفوا حاجة عن المسيحيين او غيرهم والعكس صحيح
كمان انت عندك غياب للمشروع القومى اللى يلم الكل جنب بعضهم ويبقوا ايد واحدة
الكلقى فاضى وماوراهوش اى حاجة غير الاخر والمختلف عنه
وكمان عندك الاعلام وده من اكبر الاسباب
الاعلام له دور كبير قوى دلوقتى بقى عندك اعلام سلفى وقنواته كتير وله ممولين مستعدين يلبوا طلباته المادية وبقى له متابعين كتير جدا
وفى المقابل بقى عندك قنوات مسيحية برضه متعصبة فبقى عندك معسكرين كل واحد شغال بيعبى اتباعه بالكره والحقد والنتيجة
زى ما انت شايف
كما ان زيادة دور غير المسلمين فى الحياه العامة خلى العين عليهم يعنى بقى عندك الفنان المسيحى والرسام البهائى والمليونير المسيحى والكاتب الملحد
فالضوء بقى عليهم وبقوا ع الساحة الاعلامية
غير اهم سبب ان مصر غاب عنها صفة المدنية
*يعنى انت شايف ان مصر مش دولة مدنية ؟
-طبعا الدولة اللى المؤسسات فيها ماشية على اساس مسلم ومسيحى حرام ولا حلال
الدولة اللى لها دين هى دولة دينية
ده انت عندك الماده2 فى الدستور بتقولك الاسلام هو دين الدولة
*بس المادة دى ما كانتش كده دى اتعدلت لاسباب سياسية ايام السادات
-اه ما احنا كلنا عارفين الحكاية وعلى فكرة ده كان السبب اللى هقوله بعد كده وهو تسييس الدين يعنى استعمال الدين لخدمة السياسة
*زى موقف الاقباط من التوريث؟
اه البابا شنوده مرحب قوى بفكرة ان جمال مبارك يبقى رئيس شوف انت بقى كام مسيحى دلوقتى مع التوريث وبيدعموا جمال مبارك
ونفس الشئ مع الاخوان المسلمين انت دلوقتى لو عندك دائرة انتخابية فيها مرشحين واحد اخوان والتانى مسيحى معظم اصوات المسلمين هتبقى للاخوانجى ومعظم اصوات المسيحيين هتبقى للمسيحى
السؤال ما بقاش مين الاصلح
السؤال مين ابن دينى
فبقى الانتماء للدين اقوى من الانتماء للدولة وده من مظاهر ضعف الدولة
والاعلام السلفى فيه كلام عن تساهل النظام معاه علشان كل همه النقاب والدقن وبيحرم الثورات والمظاهرات والخروج عن الحاكم فهم معتمدين عليه فى تنييم الناس
*طيب ايه الحل من وجهة نظرك؟
-الحل يبدأ من عندى ومن عندك من عند كل واحد فينا زى ما فيه تشدد احنا نضعف تاثيرة بالتعاون مع بعض
زى ما فيه اللى بيقول انا مسلم وانا مسيحى وانا بهائى
احنا نقول احنا مصريين
الكل يجتمع على قولة انا مصرى ندعو لاحترام الاخر ونحترم بعضنا
*بس هل ده كافى ؟
-لا طبعا انا لسه هكمل لك الخطوة اللى بعد كده هى الضغط على الحكومة لاصدار قوانين تحرم وتجرم التعصب الدينى وتعاقب افعاله باشد العقوبات
واهم حاجة القوانين دى تتنفذ
*اخر سؤال
تفتكر ده ممكن ياخد وقت قد ايه؟
بص مش هقولك بكره بس انا متفائل جدا وان شاء الله يحصل قريب.
*متشكر جدا لك
-العفو انا استمتعت جدا بالحوار معاك
